SHFMU "Martin Camaj" Gurrakoc

Shkolla Fillore e Mesme e Ulët "Martin Camaj" Gurakoc
Vendndodhja
Gurakoc Komuna Istog Kosova
Të dhëna
Lloji	Shkollë publike

SHFMU "Martin Camaj" është institucion arsimor parafillor, shkollë fillore dhe shkollë e mesme e ulët në Gurakoc, Komuna Istog, Kosovë. Kjo shkollë është një ndër institucionet arsimore më të rëndësishme në këtë zonë. Shkolla ndodhet në rrugën "Besim Kabashi" dhe ofron mësim për ciklin fillor dhe të mesëm të ulët, duke përfshirë klasat nga e para deri në të nëntën.^[1]

Kjo shkollë nuk është vetëm një hapësirë ku zhvillohet mësimi i rregullt, por edhe një qendër ku ndërmerren projekte dhe aktivitete që synojnë përmirësimin e kushteve të të nxënit dhe përfshirjen e të gjithë nxënësve, pa dallim. Një nga projektet më të rëndësishme të realizuara vitet e fundit ishte furnizimi i shkollës me pajisje të reja për laboratorët shkencorë dhe mjete të konkretizimit, në bashkëpunim me Organizatën Ndërkombëtare për Migrim (IOM) dhe Komunën e Istogut.

Përveç kësaj, shkolla ka treguar angazhim të veçantë edhe për përfshirjen sociale të nxënësve nga komunitetet romë, ashkali dhe egjiptian. Në kuadër të një aktiviteti të organizuar në bashkëpunim me shoqatën "Syri i Vizionit", janë shpërndarë 100 pako shkollore për fëmijët e këtyre komuniteteve që jetojnë në fshatrat Serbobran dhe Gurrakoc, me qëllim lehtësimin e barrës ekonomike dhe inkurajimin për të vijuar shkollimin.^[2]

Martin Camaj, emrin e të cilit mban shkolla në Gurrakoc, ishte një ndër figurat më të shquara të letërsisë dhe kulturës shqiptare të shekullit XX. I lindur më 21 korrik 1925 në fshatin Temal të Dukagjinit dhe i ndarë nga jeta më 12 mars të vitit 1992 në Mynih të Gjermanisë, Camaj ishte një poet, studiues, gjuhëtar dhe pedagog i përkushtuar, i cili dha një kontribut të jashtëzakonshëm në zhvillimin e gjuhës shqipe dhe në ndriçimin e trashëgimisë kulturore kombëtare. Ai studioi dhe punoi për shumë vite jashtë Shqipërisë, kryesisht në Itali dhe Gjermani, ku ishte profesor i gjuhës shqipe në Universitetin e Mynihut dhe autor i veprave të rëndësishme gjuhësore, letrare dhe filologjike.

• Arsimi në Kosovë

1. ↑ Komuna, Info. "Istog: Shkolla Fillore "Martin Camaj" pajiset me inventar të ri". Info Komuna. Marrë më 2025-05-11.
2. ↑ "SHFMU Martin Camaj në Gurrakoc - Gjirafa.biz". SHFMU Martin Camaj - Gjirafa.biz. Marrë më 2025-05-11.