Burg, me sait em au Burg bi Murte, isch en Ortschaft und früehner e sälbständigi Iiwohnergmeind im Seebezirk (französisch: District du Lac) vom Kanton Freiburg i de Schwiiz. Der früehner französischi Name vom Dorf isch Châtel. Am 1. Januar 1975 isch Burg z Murte iigmeindet worde.
Geographii
Burg lit uf er Höchi vo 518 m ü.M. in dr Luftlinie 2 km östlig vom Bezirkhauptort Murte. S Buuredorf lit uf em Hochplateau südöstlig vom Murtesee, westlig vom Erosionsdal vom Burggrabebach, im Molassehügelland vom nördlige Freiburger Mittelland, wo vom iisziitlige Rhonegletscher gformt worden isch, zwüschen em Murtesee und em Saanedal. S ehemolige Gmeindigebiet umfasste s Plateau vo Burg mit em Daliischnitt vom Burggrabebach.
