Clara Gostynski

d Clara Gostynsky (2022)

D Clara Richard Gostynski (* 1995 z Biel/Bienne) isch e Schwyzer Schauspiileri un Architäkti.

Lääbe

D Clara Gostynski het no dr Schuel zeerscht Architäktuur an dr ETH Züri studiert.[1] Zäem mit dr Ella Esslinger git si Nachglühen/Afterglow uuse.[2] S redakzionaäll Brojäkt luegt uf d Architäktuur dur s Lääbe vu dr Grooßmietere, s isch e Archiiv un au e Publikazioon, wu Daagbiecher, Familienalbe, Fotokopie, Zaichnige, Aalaitige un Lischte ufgfiert sin. Aagläänt an d Kultuurtheoretikeri Svetlana Boym goot s Brojäkt Foorme vu architektonischer Noschtalgy noo go Mythe, Erinnerige, bolitischi Kunzäpt un Stiilriichtige z entdecke.[3] Nachglühen/Afterglow isch fir dr Prix Meret Oppenheim 2025 im Beraich Architäktuur nominiert gsii.[4]

Iren eerscht Ufdritt as Schauspiileri het d Gostynski 2021 im Chuurzfilm Il faut fabriquer ses cadeaux vum Cyril Schäublin ghaa. Ire eerscht Hauptroll het si au unter dr Reschy vum Schäublin ghaa, im Film Unrueh vu 2022.[5] Si spiilt doodin d Fabrikarbaiteri Josephine, wu 1877 iber d «Unrueh», wu im Innere vu dr mechaanische Uure schwingt, wache duet. D Josephine losst si vu neie Idee inschpiriere, foorderet s Änd vu Nazionalismus un Määrtgsetz un setzt si fir Pazifismus un Solidariteet yy. Dr Film isch bi dr Berlinale fir dr Bryys fir dr Bescht Film nominiert gsii un het dr Speziaalbryysw vu dr Schüüry in dr Sekzioon «Encounters» gwunne.[6]

Im dytsch-franzeesische Film Meine Frau weint vu dr Angela Schanelec, wu sy Wältpremiere uf dr Berlinale 2026 ghaa het, spiilt si ne Nääberoll.

D Clara Gostynski läbt un schafft z Züri un z Brüssel.[1]

Filmografy

  • 2021: Il faut fabriquer ses cadeaux (Chuurzfilm)
  • 2022: Unrueh
  • 2026: Meine Frau weint

Fueßnote

  1. 1 2 Clara Gostynski. In: swissfilms.ch. Abgruefen am 7. Februar 2026.
  2. ↑ Clara Gostynski. In: womenwritingarchitecture.org. Abgruefen am 10. Februar 2026.
  3. ↑ Nachglühen/Afterglow. In: bauwelt.de. Abgruefen am 10. Februar 2026.
  4. ↑ Schweizer Kunstpreise 2025. In: schweizerkulturpreise.ch. Abgruefen am 10. Februar 2026.
  5. ↑ Unrueh. In: filmcoopi.ch. Abgruefen am 10. Februar 2026.
  6. ↑ Unrueh. In: berlinale.de. Abgruefen am 10. Februar 2026.
Dä Artikel basiert uff ere fräie Übersetzig vu dere Version vum Artikel „Clara_Gostynski“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is available under Creative Commons Attribution-Share Alike 4.0 unless otherwise noted. Additional terms may apply for the media files.