Hanna Scheuring

D Hanna Scheuring (* 15. Juni 1965 z Wettige[1]) isch e Schwyzer Schauspiileri un Theaterlaiteri.

Lääbe

D Hanna Scheuring isch as jingschti vu vier Schweschtere bi Züri ufgwachse. No dr Schauspiilleer am Konservatorium fir Musik un Theater z Bärn het si fir e baar Joor z Dytschland am Landestheater Marburg un am Theater Trier gspiilt.

In dr Schwyz chännt mer si syt ire Roll as Vreni in dr erfolgryche Sitcom Fascht e Familie vum Schwyzer Fäärnsee. Si het in dr Soap Lüthi und Blanc un in diverse Film mitgspiilt, zem Byschpel Schönes Wochenende vu dr Petra Volpe, Der Keiler vum Urs Egger, Utopia Blues vum Stefan Haupt.

Si isch au alli Ränn uf dr Theaterbiini gstande, so im Stuck Business Class vum Martin Suter am Casinotheater Winterthur. In dr Saison 2010/2011 het si ire eerscht Solo-Stuck gspiilt, Grönland vum Hansjörg Schertenleib, wu dr Autor fir sii gschriibe ghaa het. Im Septämber 2012 het ire eerscht aige Stuck, Love, Marilyn (Reschy: Jean Grädel) im Phönix-Theater 81 z Steckborn Premiere ghaa.[2][3] Anne 2014 isch si Laiteri vum Zürcher Bernhard-Theater woore.

D Hanna Scheuring schafft as Reschiseeri un as Coach un unterstitzt Mänschen us Kultuur, Spoort un Wiirtschaft in Ufdrittskumpetänz. Si engaschiert si fir UNICEF un isch uf Somalia graist go si deert zum Thema Maidlibschnyydig informiere.

Si isch Mueter vu zwai Chinder. Syt 2023 isch si ghyroote mit em Daniel Rohr.[4]

Filmografy

  • 1994–1998: Fascht e Familie (Fäärnsehseerie)
  • 2000–2002: Lüthi und Blanc (Fäärnsehseerie, as Jeannine Waelti-Kern)
  • 2001: Utopia Blues
  • 2012: Tatort – Hanglage mit Aussicht

Fueßnote

  1. ↑ Mini Beiz, dini Beiz. In: SRF Promi-Spezial. 12. Septämber 2020, (bi 2:32 sait d Scheuring, si sei nit z Züri uf d Wält chuu; bi 9:21 «Hanna Scheuring – 1965 in Wettingen geboren»).
  2. ↑ Bricht im Bote vom Untersee und Rhein vum 20. Septämber 2012
  3. ↑ Brigitte Elsner-Heller: Eine Frau will eine andere sein. Premierebriicht uf St. Galler Tagblatt vum 20. Septämber 2012.
  4. ↑ «Vreni» ist unter der Haube. In: Blick.ch. 27. Augschte 2023.
Dä Artikel basiert uff ere fräie Übersetzig vu dere Version vum Artikel „Hanna_Scheuring“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is available under Creative Commons Attribution-Share Alike 4.0 unless otherwise noted. Additional terms may apply for the media files.