Jean-Michel Faure

Dr Jean-Michel Faure [ʒɑ̃ miʃɛl fɔʁ] (* 1941 z’ Àlgiar, Département Àlgiar, Frànzeesch-Nordàfrìkà, hìtt Àlgeeria) ìsch a Bischoof vu dr kàthoolisch-tràdizionàlìschta ‚Priaschterg’mainschàft Marcel Lefebvre‘.

Dr Faure schtàmmt vun’ra Büürafàmìlia, wo sìch friahj ìm 19. Joohrhundert ìn Frànzeesch-Àlgeeria nììderg’loo hàt. Nooh dr Unàbhangikait vun Àlgeeria ìsch d’ Fàmìlia Faure ìn Àrgentiinia gànga ge laawa. Doo hàt’r dr Arzbischoof vu Paraná kännag’lehrt, wu-n-em vum Arzbischoof Marcel Lefebvre g’rädd hàt. Ar ìsch àlso ìn d’ Schwiiz g’raist, fìr dr Lefebvre traffa.^[1] Ar ìsch ìm Oktoower 1972 ìns Seminààri vu dr Priaschterbriaderschàft St. Piüs X. z’ Écône ìm Kàntoon Wàllis gànga ge schtüdiara.^[2] Ìm 1977 hàt em dr ehamooliga Arzbischoof Marcel Lefebvre s’ Sàkràmant vu dr Priaschterwäih g’schpanda. Nooh siinera Ordinàzioon ìsch’r ìn d’ Verainigta Schtààta, Kolumbià, Chile un Àrgentiinia g’raist, fìr därt s’ Nätzwark vu da Masszäntra mìt’m àlta Ritüs orgànisiara.

Vu 1980 bis 1985 ìsch dr Faure dr äärschta Dirakter vum Ìnternàzionààla Priaschterseminààri „Unsra Liawafràui un Mìtärleesera“ z’ La Reja ìn Àrgentiinia gsìì. Ar ìsch därt bis 2009 Profasser blììwa. Ànna 1985 ìsch’r üsserdam Laiter vum Dischtrikt Mexiko vu dr Piüsbriaderschàft ärnännt worra. Ànna 1986 hàt em dr Lefebvre vorg’schlààga, Bischoof z’ waara; dr Faure hàt änder wälla, àss dr Schpààniar Alfonso de Galaretta g’wäijt wìrd.^[1]

Zitter 2013 hàt sìch dr Faure geega-n-a Ärneecherung vu dr Piüsbriaderschàft àn dr Hailiga Schtüahl g’schtällt.^[3] Ar hàt dr Bischoof Richard Williamson unterschtìtzt, wu där doo üss dr Piüsbriaderschàft üssg’schlossa worra-n-ìsch un d’ Beweegung „SSPX Resistance“ (àui ‚La Resistencia‘ un ‚Priaschterg’mainschàft Marcel Lefebvre‘ g’nännt) grìnda hàt. Ànna 2014 ìsch’r salbscht üss dr Piüsbriaderschàft üssg’schlossa worra.^[4]

Àm 19. März 2015 hàt dr Richard Williamson dr Faure ìm bràsiliàànischa Kloschter Santa Cruz z’ Nova Friburgo (bii Rio de Janeiro) zem Bischoof g’wäijt.^[5][6][7] D’rfìr hàt em dr Williamson a Vertrattungsmàndààt gaa.^[8] Dàs hàt dr Frànsisküs nàdììrlig nìt woohrg’numma, àlso sìnn baida dur dia Wäih nooh-n-em kàthoolischa Kìrcharacht offiziäll üss dr Kìrìch üss’gschlossa worra.^[9][10][11] D’ Piüsbriaderschàft hàt dia Bischoofswäih schàrf verurtailt un hàt g’sajt, àss dia näija Wäih nìcks z’ tüa hàt mìt da Bischoofswäihja, wo dr Lefebvre ànna 1988 g’schpanda hàt.^[12][13][14] Nooh dr Briaderschàft solla dr Williamson un dr Faure d’ reemischa Beheerda uffabààr nìmm àànärkänna.^[15]

Dr Faure woohnt noch hìtt ìm tràdizionàlìschta Kloschter vu La Haye-aux-Bonshommes z’ Avrillé (Maine-et-Loire), wo-n-a lànga Zitt da Piüsbriader nooch g’schtànda hàt.^[16]