Lykomiden

D Lykomide (altgriech. Λυκομίδαι, Lykomidai) sind i de Antiki e Priestergschlecht vo Athen gsii.

D Lykomide hend e Hailigtum z Phlya ghaa, wo öppe zwölf Kilometer vo Athen ewegg glegen isch. Dai hend si ghaimi Initiationsritual zu Eere vo de "Groosse Göttin" döregfüert.[1] Die dörstid weleweeg äänlich gsii sii, wie Mysterie vo Eleusis.

D Hymne för d Demeter, wo d Lykomide gsunge hend, stammt vom Mousaios.[2] D Hymne för de Eros söled aber de Orpheus dichtet haa.[3]

E bikannte Aaghöörige vo de Lykomide isch möglicherwiis de Themistokles gsii. De hett, nochdem d Perser s Hailigtum z Phlya zerstört hend, mit siim aigne Geld da wider uufbaue loo. Weniger bikannt isch de Methapos, wo z Thebe und z Andania Mysteriekutl ernoieret hett.

Noowiis

  1. ↑ Plutarch: Themistokles 1.4
  2. ↑ Pausanias: Raise z Griecheland 1.22.7
  3. ↑ Pausanias 9.27.2

Literatur

  • Elke Stein-Hölkeskamp: Lykomidai. In: Der Neue Pauly (DNP). Band 7, Metzler, Stuttgart 1999, ISBN 3-476-01477-0, Sp. 565–566.
This article is issued from Wikipedia. The text is available under Creative Commons Attribution-Share Alike 4.0 unless otherwise noted. Additional terms may apply for the media files.