Veronica Kerber

D Veronica Kerber (* 1979 z Achere as Veronica Tewes) isch e dytschi Dialäktdichteri.

Lääbe

Si isch z Achere uf d Wält chuu un bi Owerkirch im Renchdal in ere Großfamilie mit aacht Gschwischtrig ufgwagse. No dr Schuel het si ne zwoosproochigi Turismus-Uusbildig (DB/ SNCF Strasbourg) gmacht un derno ab 1999 Chunschtgschiicht un Kultuurwisseschaft an dr Tächnische Uniwersiteet z Chaarlsrue studiert. Si schafft z Charlsrue im Regierigsbresidium.

Syter anne 2016 schrybt d Kerber im Dialäkt vum Renchdal. In de Joor 2017, 2019 un 2021 isch si Bryysdreegeri in dr Spaarte Proosa vum Wettbewäärb „Gnitze Griffel“ gsii. wu vum Arbeitskreis Heimatpflege e.V. im Regierigsbresidium Charlsrue uusgschriibe wiird. Anne 2022 isch s Bryydreegeri in dr Spaarte Proosa / Alemannisch gsii bi me Wettbewäärb vum Autorennetzwerk Ortenau-Elsass. D Kerber isch Mitgliid im Arbetskrais „Mundart in der Schule“.

Anne 2023 het si dr Verain „Unsere Sprachheimat – schwätze, redde, babble“ mitgrindet, wu si fir d Dialäkt z Noordbaade yysetze duet. Im Verain isch si aini vu zwai Voorsitzer*ne. Dr Verain isch au Mitgliid im Dachverband vu dr Dialäkt Baade-Wiirtebäärg, deert isch d Veronica Kerber zur stellverdrättende Voorsitzeri gweelt woore.

Si setzt si vor allem fir d Feerderig vum Dialäkt bi Chinder yy, macht in irem „Häxehyysli“ in irem Gaarte Dialäktlääsige fir Chinder un het zäme mit em Michael Körber fir dr Verain Unsere Sprachheimat au d Syte „Babbel-Bobbel“ ufgsetzt, wu si äxtra an Chinder riichtet.

Zäme mit irem Brueder Andreas Ludwig Tewes het d Kerber s Buech „Alemannische Abendlieder“ vereffetligt. Si het d Täxt zue de Lieder gschribe, är het si vertoont. Ire sei s wichtig gsii, ass me die Lieder fir Chinder au in anderi Dialäkt cha ibersetze, doderzue het si anderi Dialäktdichter gfrogt, unter anderem dr Thomas Liebscher un dr Charly Weibel hän derno au Lieder in iri Dialäkt ibersetzt. Zum Buech isch au ne CD uusechuu, wu d Lieder gsunge wore sin vu dr Mary Roos Weber, beglaitet vum Philipp Marx an dr Gitarre.

Si isch ghyroote, het zwoo Deechtere un läbt mit ire Familie im Chaarlsruer Stadtdail Hohenwettersbach.

Wäärch

  • zäme mit em Andreas Ludwig Tewes: Alemannische Abendlieder. Neue Lieder aus dem Schwarzwald. Illustriert von Simone Vögele. Mit Noten und Audio-CD. Mit Übersetzungen von Dr. Ewald Hall, Sandhya Hasswani, Thomas Huber, Pius Jauch, Margarete Lang, Thomas Liebscher, Manuel Obert, Petra Rieger-Bühler, Sebastian Unbehauen, Charly Weibel, Dr. Wolfgang Wulz und Heidi Zöllner. 60 S. mit 50 farbigen Illustrationen. ISBN 978-3-95505-369-7
  • Exodischer Iberrescht. In: Die Ortenau 102, S. 53–56 (Digitalisaat)
This article is issued from Wikipedia. The text is available under Creative Commons Attribution-Share Alike 4.0 unless otherwise noted. Additional terms may apply for the media files.