Wavvyboi

S Wavvyboi^[1] (* 28. April 1998 z Balzers,^[2] Liachtaschtaa; buurgerli Simon Vogt^[3]), stilisiert as wavvyboi, isch e nitbineer*i Sänger*i un Songwriter*i vu Liachtaschtaa. Äs git sälber as Pronomen „he/she/they“ aa.^[4]

Im Alter vu zwelf Joor het s bim Stefan Frommelt aafange Klavier leere. Dr Fromelt heeb s mit Musik in Verbindig brocht un s mit de Grundlaage vu dr Musikbrodukzioon verdröut gmacht.^[5] As Teenager het s in verschiidene Alternative-Band gspiilt, wu s au zum eerschte Mool as Sänger*i ufdrätten isch un aafange het Songcover uf dr Streaming-Blattfoorm SoundCloud vereffetlige.^[3] Wu s ais vu syne aigene Lieder in ere Facebookgruppe dailt ghaa het, sin Chinschtler*ne vu Dytschland uf s ufmeerksaam woore, unter anderem Dat Adam, un hän s in ire Studie yyglaade. Doodruf het s d Schuel abbroche un isch uf Köln zooge go si ganz uf sy Musikkarriere kunzäntriere..^[5] Näbe ne baar chlaine Ufdriott z Liachtaschtaa het s ab 2019 as Dail vum Musikerkollektiiv CYBER-GEN e Tuur dur Dytschland, Eeschtryych un d Schwyz gspiilt.^[6] Äs stoot syter anne 2019 bim Musiklabel Space Music Records unter Verdraag, wu mit Groove Attack un Chimperator Live kollaboriert.^[7] Syterhäär het s au ne baarmool mit Taddl un em Broduzänt Marley, friejewr Dat Adam, zämegschafft, aber au mit em Labelkolleeg Kelvyn Colt. Mit em Colt isch d*r Sänger*i Gsiicht vun ere Kampagne vu About You un Levi’s zum Teema Sälbschtbstimmthait un Individualiteet gsii, wu s wavvyboi un dr Kelvyn Colt dr Song derfiir broduziert hän.^[8]

Anne 2022 isch sy Debütalbum all die engel & daemonen sind wir selbst uusechuu, wu im Sälbschtverlaag mit Hilf vu Groove Attack vereffetligt wooren isch un bis uf Blatz 9 vu dr dytsche Tschart chuu isch.

Mit em Song Black Glitter het s am dytsche Voorentschaid fir dr Eurovision Song Contest 2026 dailgnuu, Eurovision Song Contest – Das Deutsche Finale 2026,^[9] uím Superfinale isch er uf dr zweet Blatz chuu.^[10]

As musikaalischi Yyfliss un Inschpirazioone nännt s Jimi Hendrix, d Beatles, The Weeknd, Lil Peep un Kurt Cobain. In syne Song verschafft s sy Ängscht, Soorge un git syyne Gfiel un Erfaarige Uusdruck. Dur d Musik verschafft s traumaatischi Erlääbnis un perseenligi Broblääm un git de Zueheerer*ne intiimi Yyblick in sy Lääbe, vu psiichische Chrankete, Erinnerige, wu wee dien, bis Medikamäntemissbruuch as Folg doodrus. Sy Stiil, wu s sälber Emo-R’n’B nännt, goot vu Contemporary R&B bis Emo oder Goth.^[2] Karakteristisch fir sy Musik sin diefi, duuschteri Beat un vyylmool dominante Gitarrenyysatz mit melnkoolische, samfte un hooche Melodie.^[11]

• Offiziälli Websyte
• wavvyboi bi YouTube Music
• wavvyboi bi Soundcloud

1. ↑ In däm Artikel wird wäg nit-bineere Identiteet vum wavvyboi s Pronomen äs / s bruucht.
2. 1 2 «Ich mag es rau, direkt und ohne aufgesetzten Glanz». Abgruefen am 13. Januar 2023. 
3. 1 2 Jxnosch: Wavvyboi - Die Zukunft des deutschen RnB? In: DIFFUS. 5. Dezember 2018, abgruefen am 13. Januar 2023 (de-DE). 
4. ↑ Offiziälli Bresänz uf Instagram. Abgruefen am 26. Februar 2026. 
5. 1 2 Wavvyboi: Musik als Erlösung von Dämonen - Liechtenstein - fritig, die Wochenendzeitung für die Region. Abgruefen am 13. Januar 2023 (de-DE). 
6. ↑ Ein heimlicher Star in der R’n’B-Szene. Abgruefen am 13. Januar 2023. 
7. ↑ space music records. Abgruefen am 13. Januar 2023. 
8. ↑ Ann-Christine Klesper: Rebellion for Peace: Levi's® launches Capsule Collection with an exclusive music video in cooperation with Wavvyboi and Kelvyn Colt, available only at ABOUT YOU. 19. August 2021, abgruefen am 13. Januar 2023 (änglisch). 
9. ↑ Rick: Songcheck „Das Deutsche Finale 2026“ (9): „Black Glitter“ von wavvyboi. 25. Februar 2026, abgruefen am 26. Februar 2026. 
10. ↑ Armin Linder: Deutscher ESC-Vorentscheid: Detail-Ergebnisse zeigen überraschende Zahlen. 1. März 2026, abgruefen am 1. März 2026. 
11. ↑ wavvyboi. Abgruefen am 13. Januar 2023. 

Dä Artikel basiert uff ere fräie Übersetzig vu dere Version vum Artikel „Wavvyboi“ vu de dütsche Wikipedia. E Liste vu de Autore un Versione isch do z finde.