Bubli

Bubli
Fshat
Shteti	Kosova
Komuna	Malishevë
Rajoni	Prizren
Sipërfaqja
• Total	3,8 km2 (15 sq mi)
Lartësia	508 m (1,667 ft)
Popullsia
• Total	805
Targat	04

Bubli është një vendbanim në komunën e Malishevës, Kosovë. Gjendet rreth 8 kilometra në perëndim të qendrës së Malishevës dhe është vendbanim fushor.^[1] Shkolla e fshatit gjendet mes fshatrave Bubël dhe Damanek.

Nëpër këtë vendbanim kanë kaluar rrugët e karavanëve që bartnin mallra nga Vushtrria për në Gjakovë. Kjo dëshmohet me një urë të vjetër - Ura e Rabaxhive, e cila është meremetuar nga familja Kusari në vitin 1758. Popullsia e sotme e këtij fshati janë të ardhur nga fshatrat Panorcë, Zatriq dhe Pagarushë.

Si vendbanim me emrin Bubnja përmendet në Librin e Kujtimeve të Manastirit të Shën Trinës, afër Mushtishtit, i cili ka filluar të mbahet nga viti 1465. Në një hartë austriake të përpiluar në bazë të shënimeve të vitit 1689, është i regjistruar me emrin Bubli. Edhe në sallnamet e Vilajetit të Kosovës të viteve 1893, 1896 dhe 1900 është i regjistruar si vendbanim. Në vendin e quajtur Vakaf, ekzistojnë varrezat e quajtura "Vorret e Mortajës". Mbishkrimet e tyre janë në gjuhën turke osmane dhe janë të vjetra 300-400 vjet, para ardhjes së Bytyçëve nga Panorca.

Pas vitit 1912, një pjesë e madhe e fshatit është djegur nga pushteti serb. Edhe në vitin 1919 janë djegur 4-5 shtëpi. Pas këtij viti, katër familje shqiptare me 50 anëtarë janë shpërngulur në Turqi. Sipas burimeve arkivore, më 1934, pushteti i atëhershëm u kishte konfiskuar pronat 13 familjeve të këtij fshati dhe ua kishte dhënë kolonëve sllavë. Nga ky vendbanim, shumë familje janë shpërngulur në Prizren, Pejë dhe gjetiu.

Lagjet kryesore në Bubël janë: Bytyçi, Kastrati, Morina, dhe Krasniqi. Ndër mikrotoponimet më karakteristike janë: Udha e Rabaxhive, Fushat e Pojatave, Arat e Durakut, Arat pej livadheve, Arat e Lutës, Vrella, Kroni i Moçëm, Ura e Vjetër, Udha e Karavanëve, Kalldërmi, Varret e Murtajës, Kah Ara e Demës, dhe Zabeli Mustafë Agës.

• Lista e ardhacakëve - Malishevë

• vendndodhja