Nân (këngë)

"Nân" është një këngë e këngëtarit dhe kompozitorit shqiptar Alis, me tekst të Desara Gjinit, produksion të Erjet Barbullushit dhe kompozim të vetë Alis. Kënga do të përfaqësojë Shqipërinë në Festivalin Europian të Këngës 2026.

"Nân" u shkrua nga Desara Gjini, u kompozua nga Alis Kallaçi dhe u strukturua nga Erjet Barbullushi.^[1] Alis-i u shpreh se kënga vinte nga një ëndërr, në të cilën një zë i largët kishte thënë: "Mirupafshim, nënë". Kjo frazë e thjeshtë ishte e mbushur me dhimbjen e ndarjes dhe nostalgjinë e një zemre në pritje. Në atë ëndërr erdhën vargjet e Desarës, ndërsa muzika u kompozua nga Alisi si një rrjedhë kujtimesh, ku çdo notë kishte prekur një plagë të fshehur. Kur aranzhimi i Barbullushit mori formë, Alisi ndjeu sikur kënga filloi të merrte frymë vetë.^[2] Ai gjithashtu e përshkroi këngën si "një baladë për nënat në pritje, për fëmijët që largohen dhe për dashurinë e përjetshme, përtej kohës dhe largësisë".^[2]

Më 21 tetor 2025, Nân u njoftua si një nga 28 këngët e përzgjedhura për Festivalin e Këngës 64.^[3] Kënga u publikua më 1 dhjetor.^[4] Pas pjesëmarrjes së Alis në gjysmëfinalen e parë më 17 dhjetor, kënga u kualifikua direkt për finalen më 20 dhjetor, ku mori vendin e parë, si në votimin e jurisë, ashtu edhe në atë të publikut nga televotimi.^[5] Kjo fitore i garantoi Alis-it të drejtën për të përfaqësuar Shqipërinë në Festivalin e Këngës në Eurovision 2026 në Vjenë.^[5]